Osmani kërkoi mbështetjen e Japonisë në forcimin e pozitës ndërkombëtare të Kosovës

1 min read

Presidentja e Kosovës, Vjosa Osmani në vazhdën  e takimeve bilaterale gjatë qëndrimit në Japoni, është pritur në takim nga kryeministri japonez Yoshihide Suga. Siç ka informuar sot presidenca, Osmani ka kërkuar mbështetjen e Japonisë në forcimin e pozitës ndërkombëtare të Kosovës, posaçërisht në procesin e njohjeve dhe anëtarësimit në organizatat ndërkombëtare.

Osmani, gjithashtu e ka falënderuar kryeministrin Suga për mbështetjen që ky shtet i ka dhënë Kosovës në fushën e shëndetësisë dhe mjedisit, teksa ka shfaqur gatishmërinë për thellimin e bashkëpunimit në sfera të tjera të interesit të përbashkët, sidomos për investime japoneze në Kosovë.

“Është biseduar edhe për mundësitë e shkëmbimit të studentëve në programe të ndryshme arsimore. Presidentja osmani i ka bërë ftesë zyrtare kryeministrit Suga që në një kohë të përshtatshme ta vizitojë Kosovën për ta forcuar edhe më tej partneritetin me shtetin japonez.”, është bërë e ditur në komunikatë./21Media