Padia e komunave ndaj MASHTI, Nagavci ua hedh fajin qeverive të kaluara

Ministrja e Arsimit, Arbërie Nagavci reagoi pas padisë që Asociacioni i Komunave të Kosovës ka bërë ndaj Ministrisë së Arsimit për shkak të mungesës se kontratave kolektive.
Ajo tha se për këtë u informua nga mediat. Kurse deklaroi se Prej vitit 2014 janë nënshkruar tri kontrata kolektive në mes të MASHTI dhe SBASHK, të trija në prag të procesit zgjedhor dhe asnjëra prej tyre nga qeverisja e LVV.
Sipas saj kryetarët e komunave, të cilët kanë paraqitur padi janë pjesë e partive politike që kanë qenë në pushtet kur janë nënshkruar këto kontrata dhe nuk kanë planifikuar asnjëherë buxhet.
“Disa prej tyre madje edhe në pozita të larta shtetërore. Të njejtit nuk kanë reaguar as në publik e as brenda subjekteve të tyre politike për efektet që mund t’i kenë këto kontrata në buxhetin e shtetit pavarësisht a bëhet fjalë për nivelin shtetëror a komunal e as nuk kanë ndikuar që këto mjete të planifikohen përgjatë këtyre viteve. Gjatë kësaj periudhe nuk është dëgjuar as zëri i Asociacionit të Komunave të Kosovës, i cili gjatë gjithë kësaj kohe me zell po e bën avokatin e komunave në përgatitjen e padive dhe po ngritë cështje të shumta në pengim të punës së institucioneve.”, deklaroi Nagavci.
Ajo vazhdoi duke thënë se si Qeveri e Republikës së Kosovës po ballafaqohen me pasojat e veprimeve të pararendësve të tyre.
“Por nuk do të lejojmë as zhvatjen e buxhetit të shtetit e asgjë tjetër që bjen ndesh me ligjin. Me vullnet do të adresojmë tek organet kompetente pretendimet për çdo shkelës të ligjit ashtu siç do të gjejmë zgjidhjen më të mirë të mundshme për secilën nga situatat me të cilat po ballafaqohemi duke respektuar legjislacionin në fuqi.”, tha ministra.
Sipas saj qëllimi i vërtetë i qeverisjeve të kaluara nuk ka qenë zbatimi i kontratave kolektive, por kalkulimet elektorale, pjesë e të cilave është bërë edhe udhëheqja e SBASHK-ut.
“ Pavarësisht zotimeve në kohë fushate, mesimdhenesit çdo herë janë detyruar të shkojnë në gjykata për t’i marrë pagat përcjellëse. Ndonëse kontratat janë nënshkruar që nga viti 2014, vetëm prej vitit 2019 kanë filluar të ndahen mjete për pagat përcjellëse pas pensionimit, për çka jam angazhuar edhe personalisht sa kam qenë deputete e Kuvendit të Kosovës në vitin 2018, duke paraqitur amendament të veçantë për këtë në Ligjin e Buxhetit. “, deklaroi Nagavci.
Paraprakisht përmendi se për asnjërën nga këto kontrata kolektive nuk është bërë vlerësimi i ndikimit financiar dhe asnjëra prej tyre nuk është regjistruar në Ministrinë e Punës, siç parasheh legjislacioni në fuqi.”
“-Për sqarim kontrata e parë në vitin 2014 është nënshkruar në mes të ish-ministrit të Arsimit, Ramë Buja dhe kryetarit të SBASHK-ut, Rrahman Jasharaj. Atë kohë, ishte Qeveria PDK-LDK kurse ministër i Financave, Bedri Hamza.
-Kontrata e dytë e vitit 2017, nënshkrues të kontratës kanë qenë ish-ministri i Arsimit, Arsim Bajrami dhe kryetari i SBASHK-ut, Rrahman Jasharaj. Atëkohë ka qenë Qeveria PDK-LDK kurse ministër i Financave, Avdullah Hoti.
-Kontrata e tretë e vitit 2021. Nënshkrues të kontratës kanë qenë ish-ministri i Arsimit, Ramë Likaj dhe kryetari i SBASHK-ut, Rrahman Jasharaj. Ka qenë Qeveria PAN m( PDK-AAK-NISMA) dhe ministre e Financave, Hykmete Bajrami.
Nga Ministria e Financave jemi njoftuar zyrtarisht që: Sipas legjislacionit në fuqi, për çfarëdo nisme të re qeveritare duhet të bëhet vlerësimi i ndikimit buxhetor dhe duhet të lëshohet një opinion i pavarur. Departamenti i buxhetit si njësi përgjegjëse për të pranuar kërkesat për vlerësim të ndikimit buxhetor, nuk ka pranuar asnjë kërkesë për të dhënë opinion për vlerësimin e ndikimit buxhetor në lidhje me Kontratën Kolektive në arsim, pra nuk ka pasur ndonjë planifikim buxhetor për gjithë kontratën kolektive. “, tha Nagavci.
Asociacioni i Komunave të Kosovës kaq paditur dje Ministrinë e Arsimit dhe Ministrinë e Shëndetësisë, për shkak të mungesës së kontratës kolektive.Kësaj padie nuk iu bashkuan katër komuna që qeverisen nga Vetëvendosje./21Media.