Policia jep detaje për incidentin ndërmjet nxënësve
Policia e Kosovës sot ka informuar ka arrestuar dy persona lidhur me incidentin e ndodhur ditë më parë në lagjen “Dardania”, në Prishtinës, ku ishin përfshirë disa nxënës.
Sipas Policisë, ndaj të dyshuarve gjyqtari i procedurës paraprake iu ka vazhduar masën e paraburgimit prej 30 ditëve.
“Në incidentin i cili kishte ndodhur jashtë objektit dhe hapësirave shkollore, njëri prej nxënësve kishte pësuar lëndime trupore dhe ishte dërguar për trajtim mjekësor, përderisa Policia e Kosovës është duke vazhduar hetime intensive drejt identifikimit edhe të personave të tjerë të përfshirë në rast. Policia e Kosovës lidhur me këtë rast por edhe rasteve tjera të cilat kryesisht kanë ndodhur jashtë objekteve dhe hapësirave shkollore, e të cilat nuk janë ndërlidhur me procesin mësimor apo me sigurinë në shkolla, ka ndërmarrë dhe po vazhdon të ndërmerr veprime konkrete përmes planit operativ “ Siguria në Shkolla”.”, ka informuar policia.
Përmes këtij plani, Policia ka informuar se synon parandalimin e incidenteve në shkolla dhe për rreth tyre si dhe ngritjen e mëtejme të sigurisë së përgjithshme përfshirë sigurinë në shkolla dhe rreth tyre.
“Përveç planeve operative që janë në vijueshmëri, policia ka angazhuar edhe njësi patrulluese me rroba civile, zyrtar sektorial dhe zyrtarë policor të njësisë së komunitetit, të cilët organizojnë takime me drejtori të arsimit komunal, drejtori të shkollave, kujdestar të shkollave, me këshille komunale për siguri në bashkësi, me këshille lokale për siguri publike me këshille të prindërve si dhe në vazhdimësi mbajnë ligjërata të ndryshme në mënyrë që të sensibilizojnë nxënësit dhe të parandalohen dukuritë e tilla negative. Të gjitha këto plane, veprime dhe aktivitete policore janë në përputhje me Strategjinë e Integruar të Policimit të Drejtuar nga Inteligjenca dhe Policimit në Bashkësi, përmes të cilave synohet ngritja e mëtejme e sigurisë së përgjithshme, përfshirë edhe sigurisë në shkolla dhe për rreth tyre”, ka bërë të ditur tutje policia.