Policia kërkon pagën e 13-të

Sindikata e Policisë së Kosovës po kërkojnë pagën e 13-të. Këtë kërkesë sindikata e ka adresuar nëpërmjet një letre tek ministri i Punëve të Brendshme, Xhelal Sveçla.
Në letrën dërguar Sveçlës thuhet se policët janë duke dëshmuar punën e tyre profesionale dhe përkushtimin pavarësisht sfidave me të cilat përballen duke rrezikuar edhe jetën e tyre.
“I nderuar z.Xhelal Sveçla-Ministër i MPB-së Duke pas parasysh përkushtimin e Policisë së Kosovës, gjatë vitit 2021, në angazhimet e tyre në punët e përditshme si dhe në angazhimet shtesë të planeve të ndryshme operative, si COVID 19 dhe operacioneve tjera, ku janë duke e dëshmuar punën e tyre profesionale dhe përkushtimin pavarësisht sfidave me të cilat përballen duke rrezikuar edhe jetën e tyre. Andaj kërkojmë nga Ju i nderuar z. Xhelal Sveçla-Ministër I MPB-së dhe nga Qeveria e Juaj, që për këtë fund vit të shpërblehen punonjësit e Policisë së Kosovës me një shumë ekuivalente të një page mujore, e cila sado pak do t’ju ndihmonte dhe do të ishte një shpërblim për punën e tyre të jashtëzakonshme. Këtë kërkesë e arsyetojnë punonjësit e Policisë së Kosovës, pasi që janë bartësit kryesor për sigurinë e Republikës së Kosovës dhe në veçanti janë të kyçur direkt në Ligjin për parandalimin e pandemisë COVD 19 e që për vitin 2021 nuk kanë marr asnjë shtesë edhe pse me Ligj ka qenë e paraparë. Andaj, i nderuar Ministër i MPB-së mbesim më shpresë se do t’a realizoni kërkesën tonë pa dallim për të gjithë Zyrtarët Policor dhe Stafin civil në Policinë e Kosovës”, thuhet në kërkesën e sindikatës.
Këtë kërkesë delegacioni i Sindikatës së Policisë së Kosovës, Imer Zeqiri dhe nënkryetarit Avdi Hoti janë takuar me ministrin e Punëve të Brendshme, Xhelal Sveçla ku dhe e paralajmëruan për këtë kërkesë./21Media