Polonia premton më shumë avionë për Ukrainën
Presidenti ukrainas, Volodymyr Zelensky ka vizituar Poloninë, pasi mikpritësit e tij premtuan të dërgojnë më shumë avionë luftarakë në Ukrainë.
Presidenti Andrzej Duda tha se do të dërgonte flotën e mbetur të avionëve MiG-29 të Polonisë “nëse ka ende një nevojë të tillë”.
Zelensky falënderoi vendin për mbështetjen e tij kundër pushtimit rus.
Kjo erdhi pasi presidenti rus Vladimir Putin akuzoi shërbimet e inteligjencës perëndimore për përfshirje në sulme terroriste ndaj Rusisë.
Duke folur në këshillin e sigurisë të Kremlinit, Putin nuk dha asnjë provë, por tha: “Ka çdo arsye për të thënë se burimet e vendeve të treta, shërbimet e inteligjencës perëndimore, janë të angazhuara në përgatitjen e sabotimeve dhe akteve të tilla terrorizmi”.
Zelensky mbërriti në Varshavë të mërkurën në mëngjes – duke shënuar vizitën e tij të parë zyrtare në Poloni që nga pushtimi rus i Ukrainës vitin e kaluar.
Polonia ka qenë një aleat kyç në mbështetjen e Ukrainës dhe zakonisht është në ballë në përpjekjet për furnizime me armë për fqinjin e saj.
Ishte vendi i parë që premtoi tanke Leopard 2 në Ukrainë dhe të mërkurën angazhoi më shumë avionë luftarakë të epokës sovjetike MiG-29.
Duda përsëriti se vendi e mbështet fuqimisht ofertën e Kievit për t’u bashkuar me NATO-n dhe tha se ai po përpiqej të merrte “garanci shtesë, garanci sigurie, të cilat do të forcojnë potencialin ushtarak të Ukrainës”.
Më herët, Sekretari i Përgjithshëm i NATO-s, Jens Stoltenberg tha se që Ukraina të bashkohet me NATO-n, vendi duhet të jetë i pavarur dhe demokratik – dy kritere që aktualisht nuk mund të përmbushen si rezultat i pushtimit rus.
Presidenti rus Vladimir Putin ka përdorur më parë dëshirën e Ukrainës për t’u bashkuar me NATO-n si një justifikim për pushtimin.
Vizita e Zelensky erdhi pasi ministri i bujqësisë i Polonisë dha dorëheqjen pasi fermerët ankohen për grurin e lirë ukrainas.
Polonia është kapluar nga një valë protestash për faktin se drithi ukrainas po ul çmimin e tregut të grurit polak dhe fermerët argumentojnë se BE-ja duhet të ofrojë ndihmë.