Pse shfaqet herpesi në buzë, a mund të parandalohet, tregon Dr. Murat Mehmeti

Përveç që është i bezdishëm, herpesi që shfaqet në buzë apo brenda gojës është edhe i dhimbshëm.
Infektologu Dr. Murat Mehmeti për rtv21.tv ka deklaruar se herpesi në buzë, përkatësisht në mukozën e gojës shfaqet si pasojë e infeksionit me virusin HSV1 apo HSV2 (herpes simplex virusi 1 dhe 2).

Shefi i departmentit për sëmundje seksualisht të transmetueshme në Kliniken infektive, të Qendrës Klinike Universitare e Kosovës ka bërë të ditur se shenjat e herpesit në buzë apo në mukozën e gojës janë të natyrës së vezikulave (fshikëza të mbushura me lëng) apo në formë të ulceracioneve, qoftë në buzë apo në gojë.

Shkaqet e shfaqjes së herpesit në buzë apo në mukozën e gojës, sipas infektologut Mehmeti, janë si pasojë e infeksionit me viruset e HSV apo HSV2 dhe në situatat e imunitetit më të dobët.

“Këto ndryshime mund të shfaqen here pas here”, ka bërë të ditur ai gjatë intervistës për rtv21.tv
Infektologu Dr. Murat Mehmeti ka theksuar se parandalimi i herpesit në buzë është i vështirë.

“Tek rastet e herpesit gjenital përdorimi i kondomeve si dhe barnave antivirale redukton transmetimin e virusit.”, ka shtuar Dr.  Mehmeti./21Media