SBASHK-u propozon që të shtyhet viti shkollor për 10 ditë
Sindikata e Arsimit, Shkencës dhe Teknologjisë u ka propozuar institucioneve shtyrjen e vitit shkollor për 10 ditë, pasi sipas tyre pjesa më e madhe e shkollave nuk është dezinfektuar.
SBASHK-u përmes një komunikate për media ka shprehur shqetësimin se shkollat ende nuk janë përgatitur për të nisur vitin e ri shkollor sipas kushteve të parapara për masat mbrojtëse dhe plani i MASH-it.
“Pjesa më e madhe e shkollave ende nuk është dezinfektuar, dhomat e mësimit nuk janë pajisur me dezinfektues për duar, nuk janë siguruar maskat mbrojtëse për personelin arsimor, nuk është përgatitur lista e mësimdhënësve rezervë për të zëvendësuar mësimdhënësit e sëmurë e as nuk është shpallur ndonjë thirrje a konkurs për mësimdhënës vullnetar, nuk janë përgatitur dhomat e mësimit për të siguruar distancën e duhur sociale, por nuk janë bërë edhe përgatitje të tjera brenda ambienteve shkollore. Nga ana tjetër SBASHK-ut kanë nisur t’i vijnë informacione se ka tendenca nga ndonjë DKA dhe ndonjë drejtor shkolle që mjetet higjienike dhe dezinfektuesit t’i sigurojnë përmes prindërve, qoftë duke mbledhur para nga prindërit, qoftë duke sjellë prindërit dezinfektues në shkollë“, thuhet në komunikatën e Sindikatës.
SBASHK-u është kundër iniciativave të tilla, pasi sipas tyre “në këtë situatë të rënduar sociale e ekonomike nuk është e drejtë të ngarkohen edhe më shumë apo të vihen një pjesë e tyre në pozitë të keqe para të tjerëve ngase nuk kanë mundësi të jenë pjesë e këtij aktiviteti, të cilin SBASHK-u kërkon të ndalet dhe kërkesat e shkollave në rrethanat e reja të sigurohen nga buxheti shtesë prej 9.5 milionë, që ka ndarë Qeveria e Kosovës“.
Kryesia, Këshilli Drejtues dhe kryetarët e nivelit komunal sindikal dhe të Universiteteve pas shumë diskutimeve dhe bazuar edhe në komunikimin gjatë gjithë kohës me veprimtarët sindikal nxjerr konkluzionet me të cilat publikisht njofton Qeverinë, MASH-in dhe gjithë opinionin:
Të pajisen shkollat me dezinfektues,
Të caktohen persona përgjegjës, po jo mësimdhënësit , për matjen e temperaturës së nxënësve,
Të ketë personel mjekësor kujdestar së paku në shkollat që kanë më shumë se 500 nxënës,
Të sigurohen maska dhe mjete mbrojtëse për punëtorët arsimor,
Të ketë lista të mësimdhënësve rezervë,
Të lëshohen vendime për lirimin e përkohshëm nga procesi mësimor të punëtorëve arsimor të sëmurë dhe ata të vazhdojnë të marrin paga gjatë gjithë kohës së pandemisë,
Të krijohen mundësi për kryerjen e testit për COVID të personelit arsimor,
E-shkollori dhe nisma për ditarët digjital të implementohet pas pandemisë COVID-19.
“Këto janë disa nga kërkesat e domosdoshme që duhen plotësuat para fillimit të vitit të ri shkollor“, përfundon SBASHK-u.