Sveçla: KFOR-i u ofrua të sigurojë pikat kufitare, u refuzua nga elementet ekstremiste

Ministri i Punëve të Brendshme, Xhelal Sveçla ka thënë se Njësia Speciale e Kosovës po qëndron pranë dy pikave kufitare me Serbinë për të mbrojtur policët kufitarë dhe doganierët e do të tërhiqet nga aty vetëm pasi serbët të largojnë barrikadat e vendosura. Ministri i Brendshëm ka theksuar se KFOR-i është ofruar të sigurojë policinë kufitare me forca shtesë por një gjë e tillë është refuzuar, siç ka thënë Sveçla, nga elementet ekstremiste. Këto deklarata ai i ka bërë në një konferencë për medie pas një takimi që ka pasur me homologun e tij austriak.
Ministri i brendshëm ka thënë se me një refuzim të tillë është dëshmuar qëllimi për dëmtim të sovranitetit të Kosovës.
Ministri Sveçla ka thënë se njësia speciale e Kosovës po qëndron në pikat kufitare për sigurinë e qytetarëve, duke shtuar se këto veprime nuk janë provokim e as kërcënim për asnjë qytetaret të Kosovës.
Mbështetje për krejt këto veprime i ka dhënë ministri i Brendshëm austriak, Karl Nehammer.
Ai ka thënë se Evropa po e shikon me kujdes se çka po ndodh në veri të Kosovës.
Më 20 shtator ka hyrë në fuqi vendimi i Qeverisë së Kosovës për reciprocitet të targave për automjetet serbe që hyjnë në Kosovë.
Këtë e kanë kundërshtuar serbët në veri të vendit të cilët kanë vendosur barrikada në rrugët që dërgojnë në kufirin Jarinjë dhe Bërnjak.