Themelohet grup punues për trajtimin e qenve endacakë në Prishtinë

Sot është themeluar grupi punues për trajtimin e qenve endacakë në kryeqytet.
Komuna e Prishtinës ka bërë të ditur se ky grup është themeluar në bashkëpunim edhe me aktorë jashtë strukturës komunale për trajtimin e qenve endacakë në kryeqytet.
Grupi Punues do të përbëhet nga Komuna e Prishtinës, Ministria e Administrimit të Pushtetit Lokal, Ministria e Bujqësisë, Pylltarisë dhe Zhvillimit Rural, Agjencia e Ushqimit dhe Veterinarisë e Kosovës, Oda e Veterinerëve të Kosovës, Policia e Kosovës, Fondacioni për të Drejtat e Kafshëve dhe Asociacioni i Komunave të Kosovës.
“Jemi duke e trajtuar këtë çështje me seriozitetin më të lartë, duke zhvilluar strategji afatshkurtër, afatmesme dhe afatgjatë për zgjidhjen e problemit, mirëpo për të arritur rezultatet e dëshiruara, nevojitet bashkëpunim i ngushtë dhe i mirëfilltë me nivelin qendror dhe komunat tjera të vendit”, thuhet në njoftim.
Ndryshe, qentë endacakë vazhdojnë të jenë ndër problemet permanente me të cilat përballen qytetarët e Prishtinës./21Media