Trazira në burg, mbi 40 të vrarë

Të paktën 43 të burgosur janë vrarë në trazirat e fundit vdekjeprurëse në burgjet e Ekuadorit.
Një përleshje shpërtheu midis bandave rivale Los Lobos dhe R7 në një burg në Santo Domingo, rreth 80 km në perëndim të kryeqytetit Quito.
Ekuadori po lufton me një valë dhune bandash dhe kohët e fundit ka parë trazirat më vdekjeprurëse të burgjeve në histori, transmeton rtv21.tv.
Disa pjesë të Ekuadorit janë në gjendje të jashtëzakonshme për shkak të krimit në rritje që ka tronditur vendin.
Dhjetë të tjerë u plagosën në trazira, por numri i saktë është ende i paqartë.
Në total 108 të burgosur ikën nga burgu gjatë trazirave.
Gazeta ekuadoriane El Universo raportoi se, sipas Komandantit të Policisë Kombëtare Fausto Salinas, incidenti u shkaktua nga një përleshje që përfshinte transferimin e një të burgosuri të njohur si Anchundia në burg. Ai kishte qenë një nga drejtuesit që kishte shkaktuar një trazirë të mëparshme në burg në prill, tha gazeta.
Fotot nga jashtë burgut tregojnë të burgosurit e gjakosur duke u transportuar nga kamionët në ambulancat e pritjes.
Presidenti Guillermo Lasso dërgoi ngushëllimet e tij për familjet e atyre që vdiqën dhe tha se ishte “rezultat fatkeq i dhunës së bandave”.
Ministri i Brendshëm i Ekuadorit, Patricio Carrillo, shkroi në Tëitter se qeveria po punon “për të kapërcyer problemet e sistemit të burgjeve, por është komplekse të gjesh zgjidhje të shpejta në një mjedis… dhune”.
Gati 400 të burgosur tani janë vrarë në gjashtë trazira që nga shkurti i vitit 2021.
Një nga më të këqijat ishte në shtator, kur 119 të burgosur u vranë në një burg në Guayaquil në Ekuadorin perëndimor./21Media