Ushtria ukrainase thotë se rusët po shtojnë sulmet me raketa në lindje

Forcat ruse kanë shtuar sulmet në lindje të Ukrainës duke përdorur sisteme raketash të shumta lëshuese (MLRS), veçanërisht në rajonin e Donetskut, sipas ushtrisë ukrainase.
Shtabi i Përgjithshëm i ushtrisë tha se 80 sulme të tilla u regjistruan të mërkurën, ndërsa të enjten “armiku lëshoi katër raketa dhe kreu 28 sulme ajrore dhe qëlloi më shumë se 45 herë nga MLRS”.
Të enjten, gjenerallejtënant Valerii Zaluzhnyi, komandanti i përgjithshëm i forcave të armatosura të Ukrainës, i tha gjeneralit të NATO-s Christopher Cavoli, komandantit suprem të Aleancës në Evropë, se “armiku trefishoi intensitetin e armiqësive në zona të caktuara të frontit  me deri në 80 sulme ditore”.
Por Zaluzhnyi tha se trupat ukrainase po mbanin linjat e tyre mbrojtëse.
Ai tha gjithashtu se ai dhe Cavoli kishin “diskutuar problemin e sulmeve me raketa ruse dhe përdorimin e dronëve sulmues”.
“Partnerët tanë e kuptojnë domosdoshmërinë për të furnizuar Ukrainën me sisteme të mbrojtjes ajrore dhe raketore dhe të bëjnë përpjekje të konsiderueshme për të”, tha Zaluzhnyi, raporton CNN
Kujtojmë se rreth 4.5 milionë ukrainas po merren me ndërprerjet e energjisë elektrike të shkaktuara nga sulmet ruse në infrastrukturën civile, sipas presidentit Volodymyr Zelensky./21Media