Lëvizja Vetëvendosje ka reaguar pas nënshkrimit të marrëveshjes ekonomike mes Kosovës dhe Serbisë.

Në një postim në Facebook, VV ka thënë se kjo marrëveshje duhet të kundërshtohet në Kuvendin e Kosovës, përndryshe do të çojë drejt lëshimeve të tjera, edhe më të rrezikshme. “Marrëveshja afron Serbinë brenda në Kosovë, ndërkohë që njohja prej Serbisë nuk po afrohet”.

Tutje VV-ja ka shkruar se “ajo çfarë u quajt sot normalizim ekonomik, më shumë ngjan si një ekonomizim i dështimit të shkëmbimit territorial. Mbi të gjitha, qeveria koti edhe një herë gënjeu, sepse njohja reciproke nuk u arrit, ndërkohë që çështjet e brendshme të Kosovës edhe një herë u trajtuan me Serbinë, gjë e cila është e papranueshme”.

Gjatë këtij postimi VV-ja ka komentuar disa nga pikat e marrëveshjes, duke e theksuar se kërkim falja për krimet e kryera dhe dëmshpërblimi për dëmet e shkaktuara gjatë luftës në Kosovë nuk përmendet askund. /21Media