William Walker flet për atentatin e serbëve për ta vrarë atë
Walker: Vuçiq të mos përdorë raportet me Rusinë për t’i çuar gjërat prapa
Ambasadori William Walker thotë se presidenti serb Aleksandër Vuçiq duhet të mos i përdorë marrëdhëniet me Rusinë për t’i çuar gjërat prapa në raport me Kosovën, pasi ka rritur provokimet në veri të vendit, duke vendosur edhe barrikada në dhjetor të vitit që lamë pas. Ai konsideron se faktori ndërkombëtar duhet të dënojë edhe qasjen e Serbisë karshi luftës në Ukrainë, për t’u ulur në “dy karrige”.
Walker, thotë se Vuçiq jeton sikur të ishte në periudhën para 1999-ës.
Ai thekson se roli i tij duhet të jetë demokratik, dhe jo ai që ka qenë si anëtar i qeverisë së kasapit të Ballkanit, Slobodan Millosheviq.
“Unë nuk jam një admirues i presidentit Vuçiq, as ai nuk është një admirues i imi, dëgjoj se ai vazhdon të flasë për ambasadorin Walker të vitit 1999, dhe ‘gënjeshtrat’. Ajo që ndodhi në ’99 është histori, sot kemi të bëjmë me botën reale, Kosova është një vend i vërtetë, ka një popullsi, ka shumë jo vetëm disa, por të gjitha gjërat që duhet të ketë një vend demokratik, për z. Vuçiq të përpiqet të negociojë, dhe të kthehet në vitet para 1999, padyshim që nuk pajtohem me këtë. Z. Vuçiq gjatë luftës këtu ka qenë anëtar i qeverisë në Beograd, i qeverisë së Sllobodan Millosheviqit. Pra, ju e dini, ai dhe unë nuk mendojmë njësoj, por do të shpresoja që ai të pranojë të kuptojë realitetin e situatës aktuale dhe të mos përdorë marrëdhëniet e Serbisë me Rusinë apo me dikë tjetër për t’i çuar gjërat prapa”, thotë ai.
Serbia është i vetmi vend në Ballkan që nuk ka dënuar luftën pushtuese të Rusisë në Ukrainë, dhe as nuk i ka vendosur sanksione asaj, duke tentuar të ulet “në dy karrige”.
Sipas ambasadorit Walker, faktori ndërkombëtar do të duhej të dënonte një qasje të tillë të Serbisë.
“Po, mendoj se duhet të jemi kritikë. Ajo që po ndodh në Ukrainë është padyshim e tmerrshme. Kjo tregon qartë se Rusia është shumë agresive nën pushtetin e z. Putin. Unë mendoj se Ukraina i ka treguar botës se një populli nuk i pëlqen të pushtohet, dhe shqetësohem se ka ngjashmëri mes asaj që po ndodh sot në Ukrainë dhe asaj që Kosova mund të përballet me kundrejt Serbisë… Serbia në ‘dy karrige’? Mirë, pastë fat, pastë fat. Shumë e vështirë për t’u bërë, veçanërisht sot me atë që po ndodh në Ukrainë. Fat i pamundur. Ajo që po ndodh atje është diçka për të cilën Rusia duhet dënuar, Putini duhet të mbahet përgjegjës, siç mendoj Millosheviqi dhe tani Vuçiq nuk kanë treguar se ata vërtet po mendojnë të jenë fqinj i mirë i Kosovës dhe të mos luajnë mes Rusisë dhe Evropës. Jo, kjo nuk është mirë”, thotë ambasadori Walker për KosovaPress.
Walker thotë po ashtu se një qasje e tillë e Serbisë nuk do të jetë e dobishme për sa i përket negociatave.
William Walker flet për atentatin e serbëve për ta vrarë atë
24 vjet më parë, më 13 janar të vitit 1999 një polic serb tentoi ta vriste në Prishtinë kreun e misionit verifikues për Kosovën te OSBE, William Walker, i cili i tregoi botës për krimet që Serbia kreu ndaj popullatës civile në Kosovë.
Tentim vrasja e orkestruar nga kasapi i Ballkanit, Slobodan Millosheviq, sipas Walker është cilësuar si incident dhe për këtë thotë se nga autoritetet serbe kishte marrë përgjigje qesharake.
Ndërsa tregon se ishin truprojat e tij, ata që e shpëtuan nga një granatë dore me të cilën polici serb ia kishte mësyrë ta vriste
“… Një ditë para masakrës së Reçakut, ne patëm një incident këtu, në rrugë, ku disa policë serbë, besoj policë nga Beogradi, patëm një incident të vogël, dhe truprojat e mia të sigurisë, të gjithë të rinj kosovarë, djem të rinj, ata menduan se panë një nga këta policët serbë të vinte kundër meje me granatë dore, unë nuk pashë një granatë dore, por më futën në një makinë të blinduar, më çuan në zyrë, unë insistova të kthehesha në rrugë këtu ku ishte banesa ime dhe fola me disa policë, policë serbë, dhe ata nuk dolën me përgjigje shumë të mira për atë se çfarë kishte ndodhur, kërkova të takohesha me komandantin e tyre dhe më në fund takova komandantin, dhe sipas Millosheviqit, siguria ime ishte përgjegjësi e qeverisë së Serbisë, dhe unë thashë, mirë, një nga policët tuaj, mendohet se më ka ardhur me një granatë dore, dhe nuk e di nëse është e vërtetë, por kur u përpoqa të hetoja dhe të zbuloja se çfarë kishte ndodhur, mora përgjigje qesharake”, thotë ai.
Ish-shefi i misionit të OSBE-së në Kosovë tregon edhe se serbët e kishin mohuar madje një gjë të tillë. Madje ai tregon saktësisht se edhe më kë kishin kontaktuar atëbotë për të hetuar rastin.
“Fola me gjeneralin Lonçar, i cili ishte lidhja ime e komunikimit me Millosheviqin. Unë fola me Nicola Shainoviq, i cili ishte zëvendëskryeministri përgjegjës për Kosovën, u thashë se kjo ka ndodhur dhe ata më thanë, nuk ndodhi, se truprojat e mia po gënjenin. Nuk e di se sa e vërtetë ishte kjo, por ishte një incident, nuk ishte një incident i këndshëm, dhe një polic serb shumë i dehur u fut në një makinë policie dhe u largua i ulur në sediljen e pasme të makinës së policisë me një kallashnikov pranë tij, dhe unë pyes se a është kjo mënyra se si i pyet njerëzit këtu, e le të futet në një makinë policie me automatik brenda, gjithsesi, ishte një incident shumë i çuditshëm dhe sot erdha këtu me truprojën time kryesore, dhe ai më tregonte se çfarë kishte ndodhur në të vërtetë, dhe më thotë se ishte një tentim vrasje për të më vrarë. Unë nuk e dija këtë, ata kurrë nuk më thanë këtë”, tregon Walker.
Walker thotë se nëse nuk do t’i shpëtonte atentatit dhe nëse bota nuk do të kishte dëgjuar për Reçakun, ngjarjet do të kishin një tjetër rrjedhë.
“Kjo është një pyetje shumë e mirë. Sa isha këtu, pas kësaj, kur kthehesha në Kosovë për të vizituar Kosovën e lirë dhe të pavarur, njerëzit shpesh më pyesnin, a nuk ke frikë se dikush do të tentojë të të vrasë? Unë kurrë nuk kam qenë i shqetësuar për këtë. Unë nuk kam qenë shok i Sllobodan Millosheviqit, por e dija se ai ishte shumë inteligjent për të vrarë një ambasador amerikan. Pra, për t’iu përgjigjur pyetjes suaj, nëse do të më kishin bërë atentat, nuk e di se çfarë do të kishte ndodhur. Unë mendoj se, ideja ime, besimi im është se, për shkak të asaj që ndodhi në Reçak, arrita atje menjëherë, i tregova botës me ndershmëri atë që kisha parë dhe kush mendoja se ishte përgjegjës, dhe kjo filloi një shpërthim lajmesh, gazetarë si ju, nga Kosova, nga Serbia, nga Evropa, nga e gjithë bota, dhe sa më shumë që Millosheviqi u përpoq të thoshte që ‘Walker gënjen, Walker nuk e di se për çfarë po flet, Walker punon për CIA-n’, të gjitha këto budallallëqe, Millosheviqi dhe Vuçiq, dhe Shainoviq thanë për përshkrimin tim për Reçakun, ata më shpallën persona non grata, gjë që bëri lajme të mëtejshme në mbarë botën, dhe gazetarë nga e gjithë bota erdhën këtu të dinë çfarë ndodhi në Reçak, kush është ky njeri Walker? Për t’iu përgjigjur pyetjes suaj, nëse do të më kishin vrarë mua, nëse askush nuk do të kishte dëgjuar për Reçakun, nuk jam i sigurt nëse Kosova do të ishte një vend i pavarur, i lirë e demokratik në Ballkan sot. Ju do të mund të kishit qenë ende një krahinë e Serbisë, duke jetuar në kushtet se si e trajtonin popullatën shqiptare këtu”, thotë ambasadori Walker.
Tentim vrasja ndaj ambasadorit të OSBE-së në Kosovë, William Walker ndodhi 13 janarin e vitit 1999, në zonën e njohur “Qafa” në Prishtinë./kp