Ndalimi i Petroviq në Merdare, reagon Qeveria e Kosovës
Slobodan Petroviq u ndalua nga polica serbe sot në Merdare
Qeveria e Republikës së Kosovës ka reaguar pas ndalimit të deputetit të Kuvendit të Kosovës, Slobodan Petroviq nga policia serbe. Sipas Qeverisë ndalimi i tij është bërë pa asnjë arsye.
“Qeveria e Republikës së Kosovës deklaron se kjo nuk është hera e parë që qytetarët e Republikës së Kosovës, posaçërisht ata të komunitetit serb, që punojnë nëpër institucionet e Kosovës e që janë subjekt i hetimeve, keqtrajtimeve dhe fyerjeve nga autoritetet serbe.
Qeveria e Republikës së Kosovës e quan të pa tolerueshëm rastin e sotëm dhe kërkon që këto praktika nga ana e Serbisë të ndërpriten sa më shpejtë dhe që në të ardhmen asnjë qytetarë i Kosovës, nga asnjë përkatësi etnike të mos ketë problem të tilla.
Serbia duhet ta kuptojë njëherë e mirë se situata të tilla nuk i kontribuojnë fqinjësisë së mirë.”, thuhet në reagimin e Qeverisë.
Siç është bërë e ditur edhe nga Kuvendi i Republikës së Kosovës, deputeti Petroviq teksa po shkonte për një vizitë në Serbi, është ndaluar nga policia serbe, sot në pikën kufitare në Merdare rreth orës 11:30./21Media