Veseli: Rusia po shkon drejt njohjes së Kosovës
Sipas Veselit, vizita e Putinit në Serbi duhet të merret si diçka pozitive
Kryetari i Kuvendit, Kadri Veseli, ka komentuar vizitën e presidentit rus, Vladimir Putin në Serbi, duke thënë se duhet të merret si diçka pozitive. Sipas Veselit, Rusia po shkon drejt njohjes së pavarësisë së Kosovës.
“Merreni diçka pozitive. Ne jemi me Amerikën, me perendimorët. Fqinji jonë në pjesën veriore po pretendon me kanë mirë me partnerët tanë, por po i hapë dyert Rusisë. Sido që të jetë, në vizitën e Putinit në Serbi, pas takimit me presidentin e Kosovës, Hashim Thaçi, vini vëmendje këtij fakti, janë të njejtat mesazhe të cilat ia ka thanë edhe presidentit tonë. Do të thotë se Rusia është duke shkuar drejt njohjes së Kosovës. Kjo është ajo. Kosova do të jetë në organizatën e Kombeve të Bashkuara dhe po punojmë shumë. Opozita duhet t’iu bashkangjitet proceseve”, ka thënë Veseli.
Kryetari i Kuvendit i pyetur nëse SHBA-të kanë kërkuar nga Qeveria heqjen e taksës 100 përqind ndaj mallrave serbe, ka thënë se nuk ekziston një kërkesë e tillë, por se kanë kërkuar që t’i jepet një mundësi dialogut në mes Kosovës dhe Serbisë.
“Letra e presidentit Trump, qëndrimet e këtij ambasadori të SHBA-ve që i bart qëndrimet janë mesazhe që i marrin shumë seriozisht. Ka një kërkesë që t’i jepet fuqi Kosovës në procesin e dialogut, nuk ka kërkesë për t’u hequr”, ka thënë Veseli.