29 raste të reja me COVID-19 në Gjilan

 

Në komunën e Gjilanit sot u konfirmuan 29 raste të reja me COVID-19. Numri i rasteve aktive në këtë komunë ka shkuar në 199.

Nënkryetari i komunës së Gjilanit, Arbër Ismajli, në takimin e sotëm të Komitetit të Emergjencave ka kërkuar angazhim maksimal të të gjitha institucioneve në monitorimin e gjendjes dhe sipas tij, rastet e reja janë një thirrje për kujdes më të shtuar.

“29 raste të reja që sot janë konfirmuar pozitive janë një thirrje për kujdes maksimal dhe angazhim edhe më të shtuar të të gjitha institucioneve që këto raste të shkojnë gjithnjë e në rënie. Duhet të vazhdojmë ta luftojmë virusin me respektim të rekomandimeve të institucioneve të shëndetësisë për mbajtje të distancës, përdorim të masave mbrojtëse, kujdes më të madh për higjienën dhe shmangie të grumbullimit të njerëzve. Ju lutem shumë, të vazhdojmë t’i respektojmë masat antiCOVID-19 për ta ulur lakoren e infeksionit në zero”, ka thënë Ismajli.

Ai ka bërë të ditur se inspektorët komunalë janë duke e kryer punën e tyre në bashkëpunim me Policinë e Kosovës, sikur që edhe shërbimet primare dhe ato sekondare janë duke punuar vazhdimisht, në kuadër të ruajtjes së shëndetit publik dhe zbatimit të vendimeve të institucioneve të shtetit.

“Në Gjilan janë 502 të shëruar, 199 raste aktive, 29 të vdekur dhe 49 të hospitalizuar, derisa mostra në pritje janë 26.”, thuhet në njoftimin e komunës./21Media