SBASHK: Qeveria në detyrë po i lë mësimdhënësit pa të drejta, qytetarët nën presion të rritjes së çmimeve
Sindikata e Bashkuar e Arsimit dhe Shkencës së Kosovës (SBASHK), shpreh shqetësimin e thellë për vonesën e formimit të institucioneve të dala nga zgjedhjet e 9 shkurtit 2025.
Në reagimin e SBASHK-ut, thuhet se ky bllokim i qëllimshëm, i shkaktuar nga mungesa e vullnetit politik për një kandidat konsensual për kryetar Kuvendi, po pengon trajtimin e çështjeve jetike për mësimdhënësit dhe qytetarët.
“Qeveria në detyrë, e cila për katër vite ka injoruar kërkesat legjitime të mësimdhënësve – përfshirë Kontratën Kolektive, Ligjin për Pagat dhe Skemat Pensionale – vazhdon të funksionojë në mënyrë të njëanshme, duke përjashtuar përfaqësuesit e punëtorëve nga vendimmarrja. Ndërkohë, çmimet e produkteve esenciale, përfshirë qumështin dhe bukën, janë rritur deri në 20%, pa asnjë masë mbështetëse nga qeveria. SBASHK e konsideron këtë papërgjegjësi të dyfishtë – institucionale dhe sociale”, thuhet në reagim.
Po ashtu sipas SBASHK-ut, “bllokimi i institucioneve nga kryeministri i dorëhequr dhe refuzimi i bashkëpunimit politik për zgjidhje të krizës, dëshmojnë për mungesë serioziteti dhe përkushtimi ndaj interesit publik”.
Më tej thuhet në reagim se kërkesa e SBASHK-ut është e qartë: Të formohen menjëherë institucionet legjitime; Të rifillojë dialogu sindikal dhe institucional me përfaqësuesit e mësimdhënësve; Të adresohen me urgjencë kërkesat tona dhe të ndërmerren masa kundër rritjes së çmimeve.
“Nëse kjo gjendje vazhdon, SBASHK do të shqyrtojë format e reagimit sindikal dhe qytetar në mbrojtje të të drejtave dhe dinjitetit të mësimdhënësve dhe punëtorëve të arsimit”, thuhet në fund të reagimit.
Dëshiron ta dëgjosh këtë lajm me zë?