​Arrestohet i kërkuari për disa vjedhje në Ferizaj

Është arrestuar një person që kërkohej për disa vjedhje dhe tentim vjedhje në Ferizaj.

Policia kishte nisur hetime pas rasteve të raportuara të vjedhjeve. Ajo ka identifikuar një të dyshuar 17-vjeçar.

Njësia e hetimeve e stacionit të policisë në Ferizaj, nën autorizim të prokurorit nga Prokuroria Themelore në Ferizaj i ka marrë të gjitha veprimet e nevojshme dhe kishte nisur hetimet për disa vjedhje dhe tentim vjedhje që kanë ndodhur në Ferizaj.

“Policët hetues pas një pune intenzive, grumbullimit të informacioneve në terren, shikimit të kamerave të sigurisë, kanë arritur që të sigurojnë prova të mjaftueshme dhe të identifikojnë të dyshuarin tjetër S.XH (M/K) i moshës 17 vjeçar, e më pas mbrëmë rreth orës 23:00 ta arrestojnë, i cili dyshohet se ka kryer në bashkëveprim vjedhje dhe tentim vjedhje në Ferizaj : me datën 04.04.2023 në rrugën ‘’ Isa Boletini’’ është vjedhur një veturë pikap, me datën 04.04.2023 në rrugën ‘’Rexhep Bislimi’’ është vjedhur një veturë e tipit Passat, me datën 11.04.2023 në rrugën ‘’Daut Dauti’’ është vjedhur një kamionet e tipit Mercedes, me datën 11.04.2023 në rrugën ‘’Rexhep Bislimi’’ është tentuar të vjedhet në një shtëpi banimi, me datën 11.04.2023 në rrugën ‘’Riza Goga’’është tentuar të vjedhet në një shtëpi banimi dhe të vjedhet një veturë”, njofton policia.

Policia ka bërë të ditur se i dyshuari S.XH është shoqëruar në stacionin e policisë në Ferizaj dhe pas intervistimit të tij nga policët hetues, në prani edhe të avokatit mbrojtës, me vendim të prokurorit të rastit është ndaluar në mbajtje për 24 orë, për procedura të mëtejme hetimore, ndërsa automjetet e vjedhura pas përfundimit të procedurave u janë kthyer pronarëve.