Haradinaj bëri homazhe te Shtatorja e Heroit, Zahir Pajaziti
23 vjetori i rënies së tyre
Kryeministri në detyrë i Kosovës, Ramush Haradinaj, bëri sot homazhe te Shtatorja e Heroit, Zahir Pajaziti, në Prishtinë dhe tek vendi i rënies së tre heronjve, Zahir Pajaziti, Hakif Zejnullahu dhe Edmond Hoxha në Pestovë të Komunës së Vushtrrisë, në 23- vjetorin e rënies së tyre.
Haradinaj, gjatë homazheve të shtatorja e Zahir Pajazitit, tha se komandanti Zahir Pajaziti ishte njëri nga themeluesit e UÇK-së që ka lënë pas vetës vërtet një shembull të një luftëtari të zot e të një bashkëluftëtari të mirë.
Kryeministri në detyrë, Ramush Haradinaj, ministri i FSK-së, Rrustem Mustafa, dhe kryetari i Vushtrrisë, Xhafer Tahiri, bënë homazhe te lapidari i rënies së heronjve, Zahir Pajaziti, Hakif Zejnullahu dhe Edmond Hoxha në Pestovë të Vushtrrisë.
Në fjalën e tij, kryeministri në detyrë Haradinaj tha se sot ishin në vendin ku kanë rënë në fushëbetejë tre heronjtë e Kosovës. “Këta jo vetëm që ishin luftëtarët e parë e themelues të UÇK-së, por edhe ishin luftëtarë të zotë dhe të gjithë ne i nderojmë me respekt dhe vetvetiu edhe kjo ditë është një ditë e rëndësishme në historinë tonë”, u shpreh Haradinaj./21Media