Haziri: Me Kurtin kemi mbetur jetimë, nuk e meriton asnjë ditë me duru
(Lajm i përditësuar)
“Rruga e re” është një nga emërtimet që partia opozitare, Lidhja Demokratike e Kosovës (LDK), ia ka vënë një iniciative të saj për një diskutim të gjerë publik për, siç ka thënë ky subjekt politik, dalje nga “kriza në të cilën gjendet Kosova”.
Nënkryetari i LDK-së, Lutfi Haziri tha se me këtë kryeministër (Albin Kurti), populli i Kosovës ka mbetur jetim.
Ai këtë të mërkurë për emisionin debatues “Click” në RTV21 tha se kjo Qeveri nuk duhet të durohet as edhe një ditë, sepse sipas tij kjo Qeveri i ka vënë sanksione Kosovës.
“Jemi mbetë jetimë me këtë kryeministër, i cili një ditë ka me pasë situatën sikur në Shkup, sikur marrëveshjen e Ohrit”, tha ai.
Ai theksoi se me takimet e sotme nuk kanë nisur fushatë parazgjedhore, por fushatë politike për ‘ta ruajtur partneritetin’, ndërsa Qeverinë tha se janë për ta rrëzuar vetëm me zgjedhje.
“As një ditë nuk e meriton me duru sot, sepse kjo Qeveri i ka bë sanksione Kosovës, sanksione të investimve kapitale. Që dy vjet Kosovën e ka vënë në sanksione të brendshme, investimet kapitale i ka blloku. Tash i merr i bon video punët e mia i nxjerr thotë janë punë të Qeverisë”, theksoi Haziri.
Nënkryetari i LDK-së shtoi se tash e 18 muaj kjo Qeveri është në izolim.
Haziri: Nuk kemi bërë asnjë lloj kërkese për takim të veçantë me presidenten
Nënkryetari i Lidhjes Demokratike të Kosovës (LDK), Lutfi Haziri, në emisionin “Click” të RTV21 ka thënë nuk kanë bërë asnjë lloj kërkese për takim të veçantë me presidenten Vjosa Osmani.
“Ne nuk kemi bërë asnjë lloj kërkese për takim të veçantë me presidenten. Për presidenten dhe askënd tjetër”, ka thënë Haziri.
Ndonëse, kryetari i LDK-së, Lumir Abdixhiku të mërkurën ka paralajmëruar një takim me presidenten Vjosa Osmani, pas takimit që pati me gazetarë e analistë në “rrugën e re, pa Kurtin”.
Kërkesën për takim nga kryetari i LDK-së, Lumir Abdixhiku, presidentja e Kosovës, Vjosa Osmani ende nuk e ka pranuar.
Bekim Kupina, këshilltar për Media në zyrën e Presidentës për portalin rtv21.tv ka thënë se dera e Presidencës vazhdon të jetë e hapur për liderë institucionalë dhe parti politike. “Presidentja Osmani deri tashti nuk ka pranuar asnjë kërkesë për takim. Pavarësisht kësaj, dera e institucionit të Presidencës vazhdon të jetë e hapur për liderë institucionalë dhe parti politike, në funksion të mbrojtjes së interesit shtetëror”, ka thënë Kupina./21Media