Komisioni kthen prapa projekt-statutin e Trepçës

Deputetët nga Bordi i Trepçës kërkuan një dokumentacion të plotë

Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal ka kthyer prapa projekt-statutin e Trepçës, pas vërejtjeve që dhanë deputetët e këtij komisioni.

Aty po ashtu u vendos që raporti i Panelit për zgjedhjen e Bordit të KOSTT-it t’i kalojë Kuvendit që të zgjedhë 6 anëtarë, nga 12 sa janë në listën e ngushtë.

Deputetët kërkuan nga Bordi i Trepçës që të sjellë para tyre një dokumentacion të plotë dhe, jo me orare të takimeve siç konsideruan të jetë draft-statuti i paraqitur.

Deputeti i Vetëvendosjes, Liburn Aliu tha se statuti i marrë është i njëjtë me atë që ka qenë më parë.

“Le ta bëjë bordi statutin. Nëse na i shtimë duart në statut, atëherë në hyjmë në një grup të gjerë heterogjen, ku edhe mund të bëhen gabime. Pse ne me bë amendamente? Është rrugë me e gjatë”, tha ai.

Kurse, kryetarja e këtij komisioni, Sala Berisha – Shala tha se Kuvendi miraton edhe statute. Teksa tha se zërat kundërshtarë nuk ja duan të mirën as Trepçës e as vendit.

Edhe deputetja Hykmete Bajrami nga LDK-ja u shpreh e pakënaqur me draft-statutin e marrë. Ndërsa deputeti i PSD-së, Dardan Sejdiu theksoi problemet që ka ky draft-statut.

“Nëse shkojmë faqe për faqe e shohim që nuk ka përputhje në mes të shtyllave. Vetëm na sillni kolonën e tretë dhe ne e përcjellim në Kuvend”, tha Sejdiu.

Deputeti i AAK-së, Muharrem Nitaj pyeti anërarët e bordit të Trepcës se pse nuk kanë sjelllur një draft-statut të plotë.

Pas kësaj, anëtari i bordit, Naser Peci tha se është e vështirë me u përfshi të gjitha në një draft-statut, mirëpo theksoi se kolona e tretë është shumë e përafërt me atë që është arritur marrëveshja.

Kryetari i Sindikatës të Trepçës, Shyqiri Sadiku tha se për krejt këto zvarritje përgjegjës është bordi i sindikatës, pasi nuk ka dashur t’i fus në statut vërejtjet që sindikata u ka dhënë.

Back to top button