Konjufca priti në takim drejtoreshën rajonale të Bankës Botërore

Kryetari i Kuvendit të Kosovës, Glauk Konjufca, ka pritur sot në takim drejtoren Rajonale të Bankës Botërore për Ballkanin Perëndimor, Xiaoqing Yu, e cila shoqërohej nga Massimiliano Paolucci, Menaxher i Zyrës së BB-së për Kosovë.
Në njoftimin e Kuvendit thuhet se kryetari Konjufca, me këtë rast, shprehu mirënjohje për kontributin që Banka Botërore ka dhënë ndër vite për Republikën e Kosovës, në mënyrë të veçantë për rimëkëmbjen dhe ngritjen e kapaciteteve socio-ekonomike përmes projekteve zhvillimore të mbështetura deri më tani.
“Në takim po ashtu u shkëmbyen pikëpamje për perspektivën ekonomike, marrëveshjen për përkrahjen e reformës për skemën sociale dhe projekte tjera thelbësore me interes për vendin, si dhe u ritheksua gatishmëria e dyanshme për intensifikimin e bashkëpunimit të ndërsjellë”, thuhet në njoftim.