Kryetari i PSHDK-së: Amaneti i Rugovës për miqësi me ShBA-në duhet të ruhet nga të gjithë

Kryetari i Partisë Shqiptare Demokristiane të Kosovës (PSHDK), Zef Morina, ka bërë homazhe pranë varrit të ish presidentit Ibrahim Rugova, në 15 vjetorin e pavarësisë së Kosovës.
Pasi vendosi lule të freskëta tek varri i tij, Morina tha se vizioni dhe angazhimi i Rugovës ka bërë që sot Kosova të jetë e lirë dhe pavarur.
“Sot, në këtë ditë të shenjtë po bëjmë një vizitë në një vend të shenjtë, në respekt të presidentit historik Ibrahim Rugova. Ai me vizionin dhe angazhimin e tij ka bërë që sot Kosova të jetë e lirë dhe pavarur. Amaneti i presidentit duhet të ruhet nga të gjithë ne, veçanërisht amaneti i tij që ne të kemi miqësi të ngushtë me miqtë tanë ndërkombëtar, Shtetet e Bashkuara të Amerikës dhe Bashkimin Evropian. Askush nuk guxon që këtë miqësi ta prish, pasi gurëthemeli i shtetësisë sonë është mbi këto parime”, tha ai.
Gjatë ditës sotme, homazhe pranë varrit të ish presidentit Rugova kanë bërë edhe krerët institucional dhe partiak në vend.