Lufta Ukrainë-Rusi, të rejat e fundit

Shpërthime të forta janë dëgjuar të hënën në kryeqytetin ukrainas Kiev, ndërsa Rusia ka zgjeruar sulmin e saj. Një person ka vdekur dhe gjashtë të tjerë janë plagosur kur një ndërtesë apartamentesh në lagjen Obolon të qytetit u godit më herët gjatë ditës së sotme. Asnjë dritare nuk mbeti e paprekur nga goditja e godinës së banimit, një shkallë në mes të saj u shkatërrua plotësisht dhe u dogj.
Njerëzit që jetonin në zonë ishin dukshëm të tronditur. Shumë po qanin, duke kërkuar strehim te të afërmit dhe miqtë. Një burrë dhe një grua që jetojnë në katin e nëntë të ndërtesës i thanë CNN se u zgjuan nga zhurma e papritur e një shpërthimi masiv.
Ka pasur beteja të ashpra në të gjithë vendin, duke përfshirë qytetin strategjik detar të Mykolaiv. Të paktën dy persona u vranë dhe 10 u plagosën gjatë bombardimeve në periferi të tij të hënën, sipas postimit të grupit të komunitetit të qytetit në Facebook.
Më shumë se 2.8 milionë njerëz kanë ikur nga Ukraina, ka njoftuar agjencia e OKB-së: Që nga e hëna, më shumë se 2.8 milionë njerëz kanë ikur nga Ukraina për në vendet fqinje, duke përfshirë 127,000 shtetas të vendeve të treta, tha Organizata Ndërkombëtare për Migracionin (IOM), një agjenci e OKB-së. . Sipas UNICEF-it, lufta në Ukrainë po ka një “ndikim shkatërrues” në më shumë se 7.5 milionë fëmijë.
Raundi i katërt i bisedimeve Ukrainë-Rusi për “pauzë teknike” deri të martën, ka thënë negociatori ukrainas: Negociatori ukrainas, Mykhailo Podoliak, tha në një përditësim në Twitter se është marrë një “pauzë teknike” në bisedimet Ukrainë-Rusi deri të martën. “Për punë shtesë në nëngrupet e punës dhe sqarimin e përkufizimeve individuale. Negociatat vazhdojnë,” tha Podoliak. Ai tha se sesioni i katërt po mbahej virtualisht, jo personalisht, me ekipin negociues ukrainas në Kiev.
Presidenti Zelensky do të mbajë një fjalim virtual për anëtarët e Kongresit të SHBA të mërkurën: Presidenti ukrainas Volodymyr Zelensky do të mbajë një fjalim virtual në Kongresin e SHBA të mërkurën në orën 9 të mëngjesit ET, sipas një letre dërguar anëtarëve të Dhomës dhe Senatit nga Kryetarja Nancy Pelosi dhe udhëheqësi i shumicës. Chuck Schumer.
Numri i vdekjeve në Mariupol në më shumë se 2,500: Një këshilltar në zyrën e Zelensky thotë se bombardimet ruse të qytetit jugor të Mariupol kanë shkaktuar tani më shumë se 2,500 vdekje . Një nga imazhet përcaktuese nga konflikti në Ukrainë javën e kaluar ishte fotografia e një gruaje shtatzënë duke u nxjerrë me barelë nga një maternitet në Mariupol pasi u bombardua. Sot, kirurgu i saj i tha televizionit ukrainas nga qyteti se nëna dhe foshnja e saj kanë vdekur të dy./21Media