“Mobilizimi i pjesshëm” i Putinit vetëm sa forcon mbështetjen për Ukrainën

“Mobilizimi i pjesshëm” i Rusisë dhe referendumet e planifikuara në pjesët e pushtuara të Ukrainës nuk do të pengojnë mbështetjen ushtarake të Gjermanisë për Ukrainën, njoftoi të enjten ministrja e Mbrojtjes e vendit, Christine Lambrecht.
“Përkundrazi, ky reagim i Putinit ndaj sukseseve të Ukrainës na nxit që të vazhdojmë të mbështesim Ukrainën dhe të dërgojmë këtë sinjal të qartë”, u tha Lambrecht gazetarëve në Berlin pas një takimi me homologun e saj francez.
“Ne shohim se Ukraina ka arritur suksese të mëdha. Ne shohim se si Rusia reagon ndaj këtyre sukseseve në një mënyrë të dëshpëruar”, tha ajo, duke theksuar mbështetjen që mori nga Gjermania dhe Franca.
Lambrecht tha gjithashtu se referendumet e shpallura nga zyrtarët e mbështetur nga Kremlini në Ukrainë “nuk do të kenë ndikim tek ne”, duke vënë në dukje se ato nuk do të ndryshojnë nivelin e mbështetjes që Ukraina do të marrë nga Gjermania.
Ministri francez i Mbrojtjes, Sebastien Lecornu tha se Franca do të vazhdojë gjithashtu mbështetjen e saj për Ukrainën në drejtim të armëve dhe trajnimit, duke shtuar se Franca ka nevojë për bashkëpunim brenda NATO-s për ta bërë këtë./21Media