Një i vrarë dhe një i plagosur në Zllakuqan të Lipjanit

Një 57-vjeçar është vrarë sot në Zllakuqan të Lipjanit dhe një tjetër është plagosur.

Lajmin për rtv21.tv e ka konfirmuar Flora Ahmeti, zëdhënësja e Policisë së Kosovës për rajonin e Prishtinës.

Ahmeti ka treguar se Policia ka arrestuar dy të dyshuar.

Sipas Ahmetit, bazuar në dyshimet e para thuhet se pas një mosmarrëveshje mes disa personave ka ardhur deri te plagosja e rëndë me thikë e dy personave.

“Rreth orës 13:00, policia ka marrë informatën për një vrasje  që ka ndodhë  në fshatin Zllakuqan të Lipjanit.  Menjëherë pas marrjes së informatës policia ka dalë në vendin e ngjarjes  dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen.  Bazuar në informacionet e para janë ngritur dyshimet se një mosmarrëveshje mes disa personave ka rezultuar me plagosjen e  rëndë të dy personave, dyshohet me mjet të mprehtë thikë.  Njëri nga personat e lënduar ka vdekur, ndërsa i lënduari tjetër është dërguar për tretman mjekësor.  Vdekjen e viktimës mashkull, rreth 57 vjeç, e ka konstatuar ekipi mjekësor në QKMF në Magure. Aktualisht hetuesit policor në koordinim me prokurorinë, po ndërmarrin  veprimet hetimore për ndriçimin e plotë të rastit, ndërkohë që dy persona të dyshuar janë arrestuar”, ka thënë Ahmeti./21Media