Vazhdon rritja e çmimeve në Kosovë, inflacioni në muajin maj arrin në 12.5%

Rritja e çmimeve për produktet bazike ushqimore në Kosovë nga maji i vitit të kaluar është rritur 12.5%. Kështu ka bërë të ditur Agjencia e Statistikave (ASK) në raportin e ri.
ASK-ja thekson se Indeksi i Harmonizuar për Çmimet e Konsumit për muajin maj 2022 është rritur 0.9 për qind.
Sipas raportit “Indeksi i Harmonizuar Çmimeve të Konsumit, maj 2022”, ngritja më e madhe e çmimeve vërehet te karburantet me 5.5%, ndjekur nga pemët me 5.4% dhe vajrat e yndyrat ushqimore me 5.2 %.
“Indeksi i tërësishëm i Harmonizuar i Çmimeve të Konsumit është më i lartë në një mesatare prej 0.9 për qind në muajin maj 2022 krahasuar me muajin prill 2022. Kjo kryesisht është shpjeguar me ngritjen e çmimeve të konsumit të bukës dhe drithërave me 1.8 për qind, mishi me 4.3 për qind, qumështi, djathi dhe vezët me 0.5 për qind, vajrat dhe yndyrat ushqimore me 5.2 për qind, pemët me 5.4 për qind, sheqeri, reçeli, mjalti, çokollata dhe ëmbëlsirat me 1.3 për qind, prodhime të ndryshme ushqimore salca, erëza kripë, ushqim për fëmijë me 2.3 për qind dhe kafja, çaji dhe kakao me 1.9 për qind”, thuhet në raportin e ASK-së..
“Uji, pijet joalkoolike, lëngjet nga pemët dhe perimet janë rritur me 1 për qind, pijet alkoolike me 0.9 për qind, këpucët me 3 për qind, mirëmbajtja dhe rregullimi i vendbanimit me 1.5 për qind, lëndët djegëse të ngurta, dru zjarri, pelet me 1.3 për qind, mobilje dhe orendi, qilima dhe mbulesa të tjera dyshemeje me 1.5 për qind, pajisjet shtëpiake me 0.4 për qind, mallrat dhe shërbimet për mirëmbajtjen e zakonshme të ekonomisë shtëpiake me 0.3 për qind, karburantet dhe lubrifikantët për pajisjet e transportit personal me 5.5 për qind, pajisjet audio-vizuale, fotografike për përpunimin e informatave me 1.2 për qind, shërbimet hoteliere me 0.5 për qind, pra me një ndikim të përbashkët të këtyre nëngrupeve prej 1.4 për qind në IHÇK”, vijon raporti.
Ndërsa, rënie e çmimeve vërehet te perimet me 10.7 për qind dhe rryma me 4.7 për qind – për shkak të rënies së konsumit të energjisë elektrike në muajin maj 2022 krahasuar me muajin prill 2022, me një ndikim prej 0.5 për qind.
Sipas ASK-së, rënie e çmimeve vërehet te nëngrupet e COICOP-it: pemët (-7,9%) me një ndikim prej -0,2 për qind në IHÇK-it./21Media

Back to top button