Vuçiq dhe Zaev në Tiranë, sot samiti i “Open Balkan”

Pas darkës joformale në Elbasan, kryeministri i Shqipërisë Edi Rama do të presë sot në Pallatin e Brigadave në Tiranë presidentin serb Aleksandër Vuçiq dhe kryeministrin maqedonas Zoran Zaev së bashku me delegacionet shoqëruese.
Në takimin e sotëm udhëheqësit e të tre vendeve, shoqërohen dhe nga anëtarë të kabineteve qeveritare si dhe sipërmarrës. Eshtë njoftuar po ashtu dhe pjesmarrja e James O’Brien, përfaqësues i Këshillit të Atlantikut.
Pak kohë më parë Shtëpia e Bardhë bëri të ditur se Presidenti Biden synon ta emërojë atë si koordinator për politikën e sanksioneve, në Departamentin e Shtetit, një post i lartë në rang ambasadori.
Në takim do të jetë gjithashtu dhe drejtuesi i Fondacionit për një Shoqëri të hapur, Alex Soros, ndërsa në seancën e hapjes do të ketë një fjalim të Komisionerit europian për Zgjerimin Oliver Varhelyi, i cili do të ndërhyjë përmes një lidhjeje online.
Në përfundim të takimit, pritet të nënshkruhen disa marrëveshje që kanë të bëjnë, me lëvizjen e lirë të njerëzve dhe mallrave.
Nisma Ballkani i hapur ka hasur në kundërshtitë e forta të qeverisë së Kosovës, ndërsa kanë refuzuar t’i bashkohen edhe Bosnja e Mali i zi, që po ashtu e shohin atë me skepticizëm. Kryeministri Edi Rama, një mbrojtës i flaktë i projektit, e sheh atë si një mekanizëm të rëndësishëm për të ardhmen e rajonit, dhe një “projekt strategjik për interesat e Shqipërisë dhe tërë kombit shqiptar”.
E martë, 21 dhjetor
Ora 09:00 Mbërritja e Vuçiç dhe Zaev me delegacionet në Pallatin e Brigadave në Tiranë
Ora 09:05 Takimi i 3 liderëve, Rama, Vuçiç, Zaev
Ora 09:30 Seancë plenare
Ora 10:30 Pushim për kafe
Ora 10:45 Diskutim i liderëve Axhendën e Ardhshme për Ballkanin e Hapur
Ora 11:30 Ceremonia e nënshkrimit
Ora 12:00 Forumi Rajonal për Bujqësi dhe Bashkëpunim Rajonal
Ora 13:00  Konferencë e përbashkët për shtyp e tre liderëve të Iniciativës Ballkanike të Hapur
Ora 14:00 Dreka zyrtare./oranews