Kërkohet paraburgim për të arrestuarit për 210 kg drogë

Është paraqitur kërkesë për paraburgim ndaj nëntë personave

Prokuroria Themelore në Ferizaj bën të ditur se ka paraqitur kërkesë për caktimin e masës së paraburgimit pranë Gjykatës Themelore në Ferizaj, kundër nëntë personave të pandehur B.S., G.K., XH.S., J.B.,F.B.,D.S., F.B., H.B dhe Z.K.

Kërkesa e masës së paraburgimit siç njoftohet në komunikatë është bërë për shkak të dyshimit të bazuar se me datën 10.02.2019, pas kontrollës në dy lokacione në Ferizaj, si rezultat janë gjetur substancë e dyshuar narkotike e llojit marihuanë në sasi prej 209kg e 202 gramë, e të cilën sasi të pandehurit e kanë pasur për qëllim që ta transportojnë jashtë shtetit të Kosovës.

Sipas njoftimit, sasia e njëjtë është sekuestruar dhe me ç’rast gjashtë persona janë arrestuar, me të cilën do të kryenin veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” nga neni 273 par.2 lidhur me nenin 281 par.1 nënpar.1.1 dhe 1.9 të Kodit Penal të Republikës së Kosovës (KPRK).

Gjithashtu, Prokuroria Themelore në Ferizaj njofton se me urdhër të Prokurorit të Shtetit,  të pandehurit B.S., G.K., XH.S., J.B.,F.B dhe F.B., gjenden në ndalim që nga data 09.02.2019 kurse tre të pandehurit tjerë D.S., H.B., dhe Z.K., gjenden në arrati./21Media