Haradinaj: Sa herë që na bien dokumente, ne do t’i publikojmë

 

Dosje të reja krime lufte janë dërguar në Organizatën e Veteranëve të Luftës të Ushtrisë Çlirimtare të Kosovës. Kjo është bërë e ditur sot në një konferencë për media të drejtuesve të Organizatës së Veteranëve të Luftës së UÇK-së.

Nga OVL e UÇK-së kanë thënë se personi që ka sjellë dosjet ka qenë tjetër nga rasti i parë. Ata kanë thënë se kanë tentuar ta ndalojnë personin, mirëpo që nuk kanë arritur.

Kreu i OVL të UÇK-së, Hysni Gucati ka bërë të ditur se në dokumentet e pranuara ka deklarata të dëshmitarëve, por jo edhe emrat e tyre.

“Sot prapë na ka ndodhur një e papritur në OVL. Diku rreth orës 15:30 , ne i kemi quajtur tash “Rrufeja 2”, për shkak se ai zotëria ik si rrufeja dhe kemi pasur probleme. Fati që s’kemi mund ta kapim se kush ishte ai zotëria. Ne kemi deklaruar edhe më herët, që Prokuroria Speciale në Hagë bashkëpunon me prokurorinë serbe dhe Gjykatën Speciale të Serbisë për krime lufte”, ka thënë ai.

Gucati ka sqaruar se nuk kanë pasur kohë t’i kontrollojnë dosjet e reja, porse ato janë në tri kopje në gjuhën serbe dhe angleze

“Ne nuk kemi pas as kohë t’i kontrollojmë u sepse ka ardhur në 15:30, ka ikë si rrufeja në shpejtësi shumë të madhe ai person, jemi munduar t’i kombinojmë materialet pak me i pa se çfarë ka në to, por emra nuk ka, janë deklarata të dëshmitarëve pa emër, por me shifra”, ka shtuar Gucati.

Ndërkaq, nënkryetari i OVL-së, Nasim Haradinaj ka thënë se dokumentet e rrjedha paraqesin dëshmi të bashkëpunimit të prokurorëve të Speciales me Serbinë. Ai ka deklaruar se ka pasur mbi 57 komunikime të speciales me drejtorin e policisë serbe dhe zyrtarë të tjerë të aparatit shtetëror të kasapit Sllobodan Millosheviq.

“Kjo është goditje për specialen sepse është absurditet që prej një institucioni ndërkombëtar që edhe faqezinjtë tanë e kanë votuar e atyre iu dalin këto. Ata po del se nuk janë as në nivelin e drejtësisë sonë… Specialja ka bërë dy poshtërsi: është një-etnike dhe duke u thirrur në marrjen e dosjeve, po vazhdon bashkëpunimin me aparatin shtetëror të Millosheviqit, të cilët vetë kanë bërë krime, vetë kanë djegur dhe vetë kanë dhunuar dhe duke marrë tash informata prej tyre, po i amnistojnë serbët dhe po i akuzojnë shqiptarët”, ka thënë Haradinaj.

Hetuesit nga Prokuroria e Specializuar e Kosovës me seli në Hagë raportohet se kanë marrë 4 mijë dosje krime lufte, të cilat ishin dorëzuar kohë më parë në mënyrë anonime në selinë e OVL të UÇK-së. Por, Haradinaj ka thënë se nuk mbajnë përgjegjësi për dosjet e rrjedhura.

“Informatat në krejt botën duke vjedhur pse duke vjedhur dhe duke paguar. Informatat kështu merren, qysh po mendojnë këta? Informata është top-sekret dhe del, atëherë mos e shiko as më si top-sekret…Askush nuk po e diskrediton Gjykatën Speciale më shumë se ajo vetveten duke lejuar t’i dalin rrjedhat dhe informatat. Sa herë të na i bien do t’i qesim dhe nuk mbajmë pikë përgjegjësie dhe as nuk lodhemi për këtë punë”, ka thënë Haradinaj.

Ai ka bërë të ditur se personi që ka sjellë 1300 dosjet e reja, ka paralajmëruar se do të sjellë dokumente të reja.

Ndryshe, Dhomat e Specializuara të Kosovës dhe Zyra e Prokurorit të Specializuar janë pjesë e sistemit të drejtësisë të Kosovës, por ndodhen në Hagë dhe kanë staf ndërkombëtar.

Dhomat e Specializuara të Kosovës nuk kanë komentuar nëse dokumentet janë autentike.