Limaj: Dialogu me Serbinë do të jetë transparent

Limaj dhe Ahmeti u takuan me Haradinajn

Zëvendëskryeministri i Kosovës, Fatmir Limaj bashkë më Shpend Ahmetin, të cilët janë mandatuar nga Kuvendi për të udhëhequr delegacionin shtetëror për bisedime me Serbinë kanë nisur takimet me krerë të institucioneve në vend.

Fillimisht Limaj e Ahmeti kanë takuar kryeministrin e Kosovës, Ramush Haradinaj dhe kryetarin e Kuvendit, Kadri Veseli.

Krejt këto takime, sipas Limajt janë në funksion të koordinimit të veprimeve dhe marrjes së gjithë informacioneve dhe dokumentacionit se çka është diskutuar deri me tani në bisedime me Serbinë.

Limaj bëri të ditur se procesi i dialogut me Serbinë do të përshkruhet me transparencë të plotë dhe llogaridhënie.

Kryeministri i Kosovës, Ramush Haradinaj sot takoi bashkëkryesuesit e Ekipit Negociator për dialogun me Serbinë, ku u zotua se Qeveria do të jetë në funksion të plotë të ekipit negociator dhe ai mund të llogaris tërësisht në ekspertizën të cilën e posedojnë të gjithë mekanizmat dhe sektorët e shtetit.

Ekipi negociator për bisedimet me Serbinë dje ka mbajtur takimin e parë ku u bë e ditur se bashkë-kryesues i ekipit negociator do të jenë kryetari i Nismës Socialdemokrate, Fatmir Limaj dhe ai i Partisë Socialdemokrate, Shpend Ahmeti.