“Mashtruese, s’je në nivelin tim”, akuza të ashpra mes ministres Hajdari dhe deputetit Lekaj
Ministrja e Industrisë, Ndërmarrësisë dhe Tregtisë, Rozeta Hajdari është përplasur me deputetin e AAK-së, Pal Lekaj, në mbledhjen e sotme të Komisionit për ekonomi. Lekaj i tha ministres Hajdari se shefi i kabinetit të saj, Kushtrim Dakaj në vitin 2020 ka mashtruar duke u paraqitur si inspektor i tregut.
“Sa e pash shefin e kabinetit, ai në vitin 2020 kish mashtrua dhe ish paraqitë si inspektor i tregut. Ju e keni bërë shef të kabinetit”, tha ai.
Por, këtë e mohoi ministrja Hajdari, e cila përmendi Lekajt psikologjinë e pasqyrës, duke i thënë se atë që mendon për veti ia aludon dikujt tjetër.
“Sa i përket shefit të stafit të kabinetit tim asnjëherë nuk ka mashtruar. Njerëzit ndoshta reflektojnë me psikologjinë e pasqyrës, pasi psikologjia e pasqyrës është ajo çka mendon për veti ia aludon dikujt”, tha ajo.
Mirëpo, deputeti Lekaj, prapë i reagoi ministres duke e quajtur të pasaktë dhe mashtruese.
“Më vjen keq ministre që je e pasaktë dhe je mashtruese, që për hirë të mediat, këshilltari i ministres Hajdari prezantohet rrejshëm si inspektor, ndalohet rrejshëm nga policia. Duhet me të ardhur keq dhe turp, pasi t’i nuk e meriton jo ministre po as në nivelin më të ulët”, theksoi Lekaj
Pas këtij debati, por edhe në mungesë të materialit që ministrja nuk ia kishte dorëzuar komisionit sa i përket realizimit të projekteve në vitin 2023 dhe planifikimeve për vitin 2024, ajo lëshoi mbledhjen, derisa në ikje e sipër tha se konstatimet e deputetit Lekaj janë të pasakta, pasi mediat sot shpifin.
“Mediat sot shpifin dhe shkruajnë”, tha ajo.
Në debat u përfshi edhe deputeti i partisë në pushtet, LVV-së, Armend Muja, i cili tha se deputetët opozitarë në këtë komision po janë të vrazhdë me ministren Hajdari.
“E kom një përshtypje që kur po vjen sidomos Rozeta Hajdari ne në komision po jemi shumë të vrazhdë më të dhe shpesh po e ka të pamundur me u përgjigj”, tha ai.
Komisioni në mbledhjen e sotme miratoi Projektligjit për Inspektoratin qendror të mbikëqyrjes së tregut dhe Projektligjit për mbrojtjen e konsumatorit.
Zyrtari i ministrisë përjashtohet nga mbledhja e komisionit, Hajdari: Lekaj e Bunjaku më bullizuan
Komisioni për Ekonomi, Industri, Ndërmarrësi dhe Tregti ka shqyrtuar në mbledhjen e sotme Projektligjin për Inspektoratin qendror të mbikëqyrjes së tregut dhe Projektligjin për mbrojtjen e konsumatorit.
Debat dhe tensione mes ministres së Industrisë, Rozeta Hajdari dhe deputetët opozitarë nxiti Projektligji për inspektoratin, ku ministrja theksoi se përmes të njëjtit kompetencat për inspektoratin do të barten në nivel qendror, derisa shtoi se inspektorët aktual në nivel komunal do të sistemohen në bazë të nevojave të komunave.
“Kemi pasur shumë diskutime për t’i bartur të gjithë inspektorët aktual që janë në nivel komunal, por nuk kemi gjetur këtë vullnet nga të gjitha komunat. Po ashtu është e pamundur që tani për tani të përcjellët ndryshimi i buxhetit lokal ose të nivelit komunal për këto paga të inspektorëve të tregut…Ne me ligjin e ri kemi bartur kompetencën në nivel qendror dhe do të zbatojmë këtë kompetencë që do të jetë e vetmja për mbikëqyrjen e inspektimeve të tregut. Kurse inspektorët komunal do të rrinë në komuna me buxhetin aktual dhe do të sistematizohen sipas nevojave të komunave”, tha ai.
Por me një dispozitë të tillë nuk u pajtua kryetari i Komisionit, deputeti Ferat Shala, i cili tha se de-facto po largohen inspektorët komunal nga struktura ligjore.
“Në bazë të kësaj që po e thoni, ju po i merrni kompetencat e inspektorateve komunale dhe i keni jashtë strukturës. De-facto ju po i largoni inspektorët komunal nga struktura ligjore, pa kompetenca, rroga kanë, a i mban komuna apo jo? Çka kanë me i mbajt komuna kur nuk kanë kompetenca”, theksoi ai.
Kundër u shpreh edhe deputetja e LDK-së, Valentina Bunjaku, e cili kërkoi një zgjidhje që inspektorët komunal të kalojnë në kuadër të ministrisë.
“Të gjejmë një model që ata inspektorë komunal të kalojnë në kuadër të ministrisë, le të plotësohet numri me inspektorë komunal dhe mos të ketë përzierje të kompetenca. Mandej ku thash me shpall vende të reja të punës, pasi ne jemi të interesuar për vende të punës. Por nuk mundemi që inspektorët aktual që janë mos me ekzistuar dhe me shpallë konkurs të ri”, theksoi ajo.
Ndërkaq, deputeti i AAK-së, Pal Lekaj, tha se ky ligj është i mjegullisë dhe centralizimit të punës së inspektoratit.
“Me këtë qasje me këto veprime, juve iu duket se i keni 51 për qind, por do të vijnë zgjedhjet të tjera dhe keni me u mbajt mend për krejt çka keni bërë në këtë ministri, mos të flasim për të tjerat…Ky ligj është i mjegullisë, lënies në mëshirë të gjithë atyre që kanë punuar me vite dhe i pa definuar”, tha ai.
Gjatë tërë mbledhjes së komisionit, deputetja e LDK-së, Valentina Bunjaku dhe deputeti i AAK-së, Pal Lekaj, debatuan pa mikrofon me këshilltarin e ministres Hajdari, Kushtrim Dakaj. Për këtë arsye, kryesuesi i komisionit, Ferat Shala e përjashtoi atë nga mbledhja.
Në lidhje me këtë reagoi edhe ministrja Hajdari, e cila tha se këshilltari i tij reagoi pasi deputetët Lekaj dhe Bunjaku vazhdimisht e kishin bullizuar dhe sharë atë.
“A është e lejuar që unë të bullizohem nga deputetët që filluan me sharje më të ulëta, por a more ndonjë masë. Ka qenë bullziim i tërësishëm ndaj personalitetit tim nga deputeti Pal Lekaj dhe deputetja Bunjaku…Ai u indinjua më shumë kur nuk u përdorë mikrofoni por u përdorën fjalët që ky i dëgjoj më afër. Prandaj ishte një reagim i tillë”, tha ministrja Hajdari.
Krahas kësaj, komisioni shqyrtoi edhe Projektligjin për mbrojtjen e konsumatorit, ku u tha se qëllimi është krijimi i një ambienti më të sigurt dhe fuqizim i konsumatorit.